ოღონდ არა "ბარსელონა" - პსჟ ცდილობს რაბიო "იუვენტუსს" მიჰყიდოს
"ბარსელონამ" გუნდის ერთ-ერთი მთავარი სამიზნე ადრიან რაბიო ხელიდან, შესაძლოა, "პარი სენ-ჟერმენთან" არსებული ცუდი ურთიერთობის გამო გაუშვას.
კატალონიელებსა და პარიზელებს ურთიერთობა მას შემდეგ დაეძაბათ, რაც "ბარსა" მარკო ვერატის ხელში ჩაგდებას აქტიურად ცდილობდა. იმავე ზაფხულში, პსჟ-მ ნეიმარი "ბარსელონას" ნების საწინააღმდეგოდ გადაიბირა და კლუბებს შორის ურთიერთობა კიდევ უფრო გართულდა.
ამჟამად, "ბარსელონასა" და "პარი სენ-ჟერმენის" ინტერესები ადრიან რაბიოსთან დაკავშირებით იკვეთება. პარიზელთა 23 წლის ნახევარმცველს კონტრაქტი სეზონის ბოლოს უმთავრდება და ის ახალი ხელშეკრულების გაფორმებას არ აპირებს. ფეხბურთელისთვის ბრძოლაში ფავორიტად "ბარსა" ითვლება, რომელიც ფრანგი შუახაზელის უფასოდ დამატებასთან ახლოსაა.
Sport-ის ცნობით, მოვლენების ამგვარად განვითარება არ აწყობს პსჟ-ს, რომელიც მზადაა რაბიო იანვარში კიდევ ერთ მსურველს, "იუვენტუსს" მიჰყიდოს, ოღონდ ფეხბურთელი "ბარსელონაში" არ გადავიდეს. რაბიოთი ასევე დაინტერესებულია "რეალი" და ვრცელდება ინფორმაცია, რომ ფეხბურთელის იანვარში შესაძენად მადრიდელებიც მზად არიან.
ამ სიახლეზე კომენტარები გათიშულია.
კომენტარები [ 7 ]