დემბელეს მორიგი უპასუხისმგებლო საქციელი
უსმან დემბელემ კიდევ ერთხელ დაამტკიცა, რომ "ბარსელონაში" წარმატების მისაღწევად მას კიდევ ბევრი რამ აქვს სასწავლი. საუბარი ახალგაზრდა ფრანგის ქცევაზე გვაქვს.
უსმან დემბელეს რომ პროფესიონალიზმი აკლდა, ეს ჯერ კიდევ მაშინ გამოჩნდა, სანამ ის "ბარსელონაში" გადმოვიდოდა. მას შემდეგ, რაც ფეხბურთელმა შეიტყო, რომ "დორტმუნდი" მას კატალონიურ კლუბში არ უშვებდა, ახალგაზრდა ფრანგი სახლში გამოიკეტა და მან გერმანულ კლუბთან ყოველგვარი კავშირი გაწყვიტა.
"ბარსელონაში" გადმოსვლის შემდეგ ცნობილი გახდა, რომ დემბელე არასწორად იკვებებოდა.
შემდეგ იყო "ინტერთან" მატჩის წინ გამართულ შეკრებაზე დაგვიანება.
დღეს კი, ახალი ინფორმაცია გავრცელდა. ცნობილია, რომ დემბელემ გუშინდელი ვარჯიში მუცლის ტკივილის გამო გამოტოვა. თუმცა, Sport-ის ცნობით, "ბარსელონას" ფეხბურთელისგან ვარჯიშის გაცდენის მიზეზის გაგება ძალიან გაუჭირდა.
იმ დროს, როდესაც ყველა ფეხბურთელი უკვე სავარჯიშო მოედანზე იყო, დემბელე არსად ჩანდა და კლუბი მასთან დაკავშირებასაც ვერ ახერხებდა. დაახლოებით საათნახევრიანი მცდელობის შემდეგ, "ბარსას" წარმომადგენლები დემბელეს დაუკავშირდნენ. გაირკვა, რომ ფეხბურთელი სახლში იყო და მას მუცელი სტკიოდა. კლუბის მედიკოსები უსმანს სახლში ეწვივნენ და მათ დაადასტურეს, რომ ფეხბურთელს, მუცლის არეში, პრობლემა აქვს.
ამ სიახლეზე კომენტარები გათიშულია.
კომენტარები [ 17 ]