"ლივერპულმა" და "ტოტენჰემმა" თვალი "ბარსელონას" სამიზნეს დაადგეს

იტალიური "ჯენოას" თავდამსხმელის, კშიშტოფ პიოტეკის მსურველთა რიცხვი გაიზარდა. "ბარსელონასთან" ერთად, ახლა უკვე 23 წლის ფეხბურთელის დამატება "ლივერპულსა" და "ტოტენჰემსაც" უნდათ.

კშიშტოფ პიოტეკმა, რომელიც "ჯენოას" გასულ ზაფხულში "კრაკოვიადან" შეუერთდა, სერია A-ს მიმდინარე გათამაშება ბრწყინვალედ დაიწყო. მან 7 მატჩში უკვე 9 გოლი გაიტანა და ჩემპიონატის ბომბარდირი სწორედ პოლონელი თავდამსხმელია. პიოტეკმა თავი ხუთშაბათს პორტუგალიასთან პოლონეთის ნაკრებშიც გამოიჩინა და გასაკვირი არაა, რომ მისით ევროპის წამყვანი კლუბები დაინტერესდნენ.

რამდენიმე დღის წინ გავრცელებული ინფორმაციით, პიოტეკით "ბარსელონა" დაინტერესდა, იტალიური Gazzetta dello Sport-ის ბოლო ცნობებით კი, მისი შეძენა "ლივერპულსა" და "ტოტენჰემსაც" სურთ. თუმცა, გენუელები იანვარში ნიჭიერი შემტევის შენარჩუნებას აპირებენ.