პაულინიოს ეფექტი - ბრაზილიელი ჩინეთში კვლავ ბრწყინავს
მას შემდეგ, რაც "ბარსელონას" საკუთრებაში მყოფი ბრაზილიელი ნახევარმცველი პაულინიო ყოფილ გუნდს, "გუანჟოუ ევეგრანდს" იჯარის წესით დაუბრუნდა, ჩინურმა კლუბმა თამაში მნიშვნელოვნად გააუმჯობესა, თავად პაულინიო კი ყველა მატჩში ბრწყინავს.
რამდენიმე წუთის წინ, პაულინიოს გუნდმა Guangzhou R&F სტუმრად 4:2 გაანადგურა, 30 წლის ფეხბურთელმა კი თავი 2 გატანილი გოლით გამოიჩინა.
მანამდე იყო "ტიანჟინთან" 3:0 მოგებული მატჩი, სადაც პაულინიომ 2-ჯერ თავად გაიტანა, ერთხელ კი თანაგუნდელს გაატანინა.
კიდევ უფრო ადრე, "გუანჟოუმ" "ჩონგქინგი" 5:0 გაანადგურა და ამ მატჩში პაულინიო ერთ გოლს დასჯერდა.
საერთო ჯამში, პაულინიოს დაბრუნების შემდეგ, "გუანჟოუმ" ჩინეთის ჩემპიონატის ოთხიდან 4 თამაში მოიგო, გაიტანა 16 და გაუშვა 2 გოლი. ბრაზილიელის ანგარიშზე 5 გოლი და 1 საგოლე გადაცემაა.
ცნობისთვის, პაულინიოს დაბრუნებამდე, "გუანჟოუს" ბოლო 3 მატჩში მხოლოდ 1 ქულა ჰქონდა აღებული. ახლა კი, გუნდი ჩემპიონობის მთავარი კანდიდატია.
პაულინიო "ბარსელონადან" ჩინეთში იჯარითაა გაშვებული და "გუანჟოუს" იანვარში მისი 50 მილიონ ევროდ გამოსყიდვის ვალდებულება აქვს.
ამ სიახლეზე კომენტარები გათიშულია.
კომენტარები [ 24 ]