"ბარსელონასთან" მატჩში "ჩელსის", შესაძლოა, ლუის ენრიკემ უთავკაცოს
ჩემპიონთა ლიგაზე "ბარსელონას" მომდევნო მეტოქის, ლონდონის "ჩელსის" მთავარ მწვრთნელად ლუის ენრიკეს დანიშვნის საკითხი კვლავ აქტუალურია.
კატალონიური Sport, ბრიტანულ პრესაზე დაყრდნობით, იუწყება, რომ არაა გამორიცხული, ესპანელმა სპეციალისტმა "ლურჯები" უახლოეს მომავალში ჩაიბაროს და "ბარსელონას" წინააღმდეგ "ჩელსის" მთავარი მწვრთნელი სწორედ ის იყოს.
ლონდონელთა ხელმძღვანელობის ანტონიო კონტეთი უკმაყოფილების მიზეზი გასაგებია - "ლურჯები" საშინელ ფორმაში არიან და ბოლო 9 თამაშიდან მათ მხოლოდ 2 მოიგეს. უკანასკნელ შეხვედრაში, რომელშიც "ჩელსიმ" "ბორნმუთს" უმასპინძლა, ლონდონელები 0:3 განადგურდნენ.
"ბარსელონას" გულშემატკივრებს შეხსენება არ სჭირდებათ, თუ რა როლი აქვს კლუბის ისტორიაში ლუის ენრიკეს. 1996 წელს, ის კატალონიაში მადრიდის "რეალიდან" გადავიდა. "ბარსელონაში" ჩატარებულ 8 სეზონში ენრიკემ გუნდის მაისური 300-ჯერ მოირგო და 109 გოლი გაიტანა. მის აქტივში 7 ტიტულია.
"ბარსელონაში" კიდევ უფრო წარმატებული იყო ლუის ენრიკეს სამწვრთნელო კარიერა. პირველივე სეზონში მან გუნდს სამივე ტიტული მოაგებინა. სულ, 3 სეზონში, ენრიკეს გუნდმა თავი 9 ტიტულს მოუყარა.
ამ სიახლეზე კომენტარები გათიშულია.
კომენტარები [ 11 ]