ლუსტიგი: თუ ნეიმარს უნდა ხალხს მესისავით უყვარდეს, ასე არ უნდა იქცეოდეს
"სელტიკის" მცველი მიკაელ ლუსტიგი ნეიმარსა და ლიონელ მესის ერთმანეთს ადარებს და აცხადებს, რომ თუ ბრაზილიელს არგენტინელის დონემდე მისვლა სურს, ის ისეთ ქმედებებს უნდა მოეშვას, რომლებითაც მან თავი ჩემპიონთა ლიგის პირველ ტურში გამოიჩინა.
გლაზგოში გამართული შეხვედრის დროს, ნეიმარი მეტოქე ფეხბურთელების, განსაკუთრებით კი ახალგაზრდა ენტონი რელსტონის პროვოცირებას ცდილობდა, მატჩის ბოლოს კი, მან 18 წლის მეტოქეს ხელი არ ჩამოართვა.
"ნეიმარი მისთვის ჩვეულ სტილში მოქმედებდა. ის ძალიან კარგი ფეხბურთელია, მაგრამ ჩვენ მის გამოხტომებს ვხედავთ და მომავალშიც დავინახავთ. ვიმეორებ - ეს მისი თამაშის ნაწილია.
ნეიმარი მეტოქის ქმედებებზე ზედმეტად რეაგირებს იმისათვის, რომ მას მოედნის დატოვება აიძულოს. თუ მას სურს, რომ ისევე უყვარდეთ, როგორც მესი უყვართ, მსგავსი ქმედებები უნდა შეწყვიტოს." - ციტირებს ლუსტიგის სიტყვებს Eurosport.
ამ სიახლეზე კომენტარები გათიშულია.
კომენტარები [ 6 ]