"ბარსელონა" "სანტოსს" 11.1 მილიონს არ გადაუხდის
"ბარსელონა" არ აპირებს "სანტოსს" ნეიმარის ტრანსფერიდან 5%, ანუ 11.1 მილიონი ევრო გადაუხადოს. ამ ინფორმაციას Marca ავრცელებს.
"ბარსელონასა" და "სანტოსს" შორის 2013 წელს გაფორმებული კონტრაქტის თანახმად, ბრაზილიურ კლუბს ნეიმარის მომდევნო ტრანსფერიდან 5% უნდა მიეღო. 25 წლის ფეხბურთელის "პარი სენ-ჟერმენში" 222 მილიონ ევროდ გადასვლის შემდეგ, ეს თანხა 11.1 მილიონ ევროს შეადგენს.
თუმცა, "ბარსელონა" მაინც არ აპირებს "სანტოსს" ეს თანხა გადაუხადოს. ამის მიზეზი ისაა, რომ კატალონიელებს ფეხბურთელი არ გაუყიდიათ. ნეიმარმა საკუთარი კონტრაქტი თავად გამოისყიდა, ანუ, პირდაპირი ტრანსფერი არ განხორციელებულა.
გავრცელებული ინფორმაციით, ნეიმარმა "ბარსელონას" სთხოვა, "სანტოსისთვის" ხსენებული თანხა გადაეხადა, მაგრამ კატალონიელები უარზე არიან.
"ბარსელონას" "სანტოსისთვის" 4.5 მილიონი ევროს გადახდა მაინც მოუწევს. 2013 წელს გაფორმებული შეთანხმების მიხედვით, კატალონიელებს ბრაზილიელებთან 2 ამხანაგური თამაში უნდა ჩაეტარებინათ, რომელშიც ნეიმარი მონაწილეობას მიიღებდა. ვინაიდან გარიგების ეს პუნქტი არ შესრულდა, "ბარსას", ხელშეკრულების პირობების დარღვევის გამო, 4.5 მილიონის გადახდა მოუწევს.
შეგახსენებთ, რომ ცოტა ხნის წინ გავრცელებული ინფორმაციით, "ბარსელონამ" ასევე უარი განაცხადა ნეიმარის მამისთვის გადაეხადა 26 მილიონი, რომელიც კონტრაქტის გახანგრძლივების სანაცვლო ბონუსი იყო. ამის მიზეზი ისაა, რომ ბრაზილიურმა მხარემ ხელშეკრულების პირობები არ შეასრულა.
ამ სიახლეზე კომენტარები გათიშულია.
კომენტარები [ 10 ]