პორტუგალიური პრესა მატიეს აკრიტიკებს
როგორც მოგეხსენებათ, ჟერემი მატიე, რომელიც ერნესტო ვალვერდეს გეგმებში არ შედიოდა, ლისაბონის "სპორტინგს" შეუერთდა. "ბარსელონამ" მას პორტუგალიურ კლუბში სამედიცინო შემოწმების გავლის უფლება მისცა და რამდენიმე დღეში ტრანსფერიც გაოფიციალურდა. ფეხბურთელმა 2-წლიანი კონტრაქტი გააფორმა და მისი გამოსასყიდი თანხა 60 მილიონი ევროა.
ფრანგმა მცველმა ახალი კლუბის მაისურით სადებიუტო შეხვედრა გუშინ ჩაატარა და შვეიცარიაში "ბაზელთან" ამხანაგურ მატჩში 2-3 დამარცხდა. რა თქმა უნდა, პორტუგალიურმა მედიამ არ დააყოვნა და კრიტიკის მთავარი ქარცეცხლი სწორედ მატიეს დაატყდა. პრესის აზრით, შეხვედრაში გადამწყვეტი როლი ყოფილი "ბარსელონელის" შეცდომებმა ითამაშა.
"ნელი გადაწყვეტილებების მიღების დროს და პოზიციური შეცდომები, რამაც შვეიცარიელებს სივრცეები გაუთავისუფლა." - ციტირებს Record-ის სიტყვებს Mundo Deportivo.
აღსანიშნავია, რომ ეს "სპორტინგის" მეორე მარცხია მიმდინარე კვირაში, წინა შეხვედრა მათ "ვალენსიასთან" დათმეს 0-3, თუმცა, იმ შემთხვევაში, მატიეს ცუდი შთაბეჭდილება არ დაუტოვებია და კრიტიკაც არ დაუმსახურებია.
ამ სიახლეზე კომენტარები გათიშულია.
კომენტარები [ 9 ]