ბართომეუ: "ნეიმარი? ფეხბურთელებმა გადაწყვეტილება თავად უნდა მიიღონ"
"ბარსელონას" პრეზიდენტმა, ხოსეპ მარია ბართომეუმ The New York Times-თან ინტერვიუში ნეიმარის შესაძლო ტრანსფერზე ისაუბრა.
"ნეიმარმა იცის, რომ ის ჩვენი ერთ-ერთი საუკეთესო ფეხბურთელია და მისი დაკარგვა არ გვინდა. გვინდა რომ ის ჩვენთან დარჩეს და კარიერა აქ განაგრძოს. მას ჩვენთან კონტრაქტი 4 წლით აკავშირებს და მგონი ამით ყველაფერი ნათქვამია. ისიც იცით, რომ ფეხბურთელები თავად წყვეტენ, უნდათ თუ არა წასვლა, მაგრამ "ბარსელონას" მისნაირი ფეხბურთელები სურს და ჭირდება. თუ გამარჯვების მოპოვება გვინდა, შესაძლო საუკეთესო ფეხბურთელები უნდა გვყავდეს."
ბართომეუმ კლუბში მიმდინარე და ნეიმართან დაკავშირებულ სხვა მოვლენებზეც გააკეთა კომენტარი. განსაკუთრებით კანონთან იმ პრობლემებზე, რომლებიც შემტევის პირველმა კონტრაქტმა გამოიწვია "ბარსელონასთან".
"მე ამ საქმეებს ნეიმარ 1-ს და ნეიმარ 2-ს ვეძახი. პირველი უკვე მოვაგვარეთ, მეორე კი გადასახადების პრობლემას არ შეეხება - მესამე პირი უფრო მეტ თანხას ითხოვს, თუმცა მათ შეუძლიათ "სანტოსს" უჩივლონ, ჩვენ აქ არაფერ შუაში ვართ."
ბართომეუმ ისიც დაამატა, რომ მსგავსი სახის პრობლემები მხოლოდ "ბარსელონაში" არ ხდება. მაგალითად მადრიდის "რეალი" და "ატლეტიკოც" მოიყვანა და აღნიშნა, რომ ხშირად ეს კლუბების პასუხისმგებლობა არ არის.
ამ სიახლეზე კომენტარები გათიშულია.
კომენტარები [ 6 ]