კლუივერტი: "პსჟ ვერატის არ გაუშვებს"
ჰოლანდიელი პარტიკ კლუივერტი, რომელიც გასულ სეზონში პსჟ-ს სპორტული დირექტორი იყო, დარწმუნებულია, რომ კატალონიის "ბარსელონა" მიმდინარე ზაფხულის სატრანსფერო ფანჯარაზე მარკო ვერატის გაფორმებას ვერ მოახერხებს.
"ბლაუგრანას" ყოფილმა შემტევმა La Sexta-სთან ინტერვიუში განაცხადა: "მე ძალიან კარგად ვიცნობ პსჟ-ს პრეზიდენტს და ისიც კარგად ვიცი, რომ მარკოს "ბარსელონაში" გადასვლა სურს, მაგრამ ვფიქრობ პარიზული კლუბი მას არ გაუშვებს."
კლუივერტი, რომელიც 30 ივნისს, "ბარსელონასა" და "მანჩესტერ იუნაიტედის" ლეგენდებს შორის გასამართ ამხანაგურ მატჩში მონაწილეობას მიიღებს, თვლის, რომ ვერატის სატრანსფერო ფასი 80 მილიონზე მეტია. "ვერატი მეტი ღირს. ვფიქრობ 100 მილიონზე მეტიც კი." - ციტირებს ჰოლანდიელის სიტყვებს ესპანური Sport.es.
პსჟ-ს ყოფილი სპორტული დირექტორი არც იმას ფიქრობს, რომ ვერატი თავის მომავალს ამ ერთგვარი "აჯანყებით" გადაწყვეტს. "შესაძლოა მას კლუბში გაჩერება არ უნდა, თუმცა საბოლოოდ ყველაფერს მაინც პსჟ გადაწყვეტს."
შეგახსენებთ, რომ კლუივერტმა თანამდებობა ივნისის დასაწყისში დატოვა, რადგან კლუბი მას ელჩობას სთავაზობდა, რაზეც ჰოლანდიელმა უარი განაცხადა. მისი ადგილი პორტუგალიელმა ანტერო ენრიკემ დაიკავა.
ამ სიახლეზე კომენტარები გათიშულია.
კომენტარები [ 23 ]