"ბარსელონა" "კამპ ნოუზე", ტრადიციულად, კარგად თამაშობს
8 მარტს "ბარსელონა" "კამპ ნოუზე" "პარი სენ-ჟერმენს" მიიღებს. ბევრი ამ მატჩს სკეპტიკურად უყურებს, ზოგიც ოპტიმისტურადაა განწყობილი და თავისი გუნდის სჯერა.
მოდით შევაფასოთ რა არის შანსი იმისა, რომ "ბლაუგრანამ" საოცრება მოახდინოს და 1/4 ფინალში გააღწიოს. გადავხედოთ ჩემპიონთა ლიგის ეგიდით "კამპ ნოუზე" გამართულ მატჩებს.
აღსანიშნავია, რომ ბოლო წლებია "ბარსელონა" "კამპ ნოუზე" კარგად თამაშობს, გუნდი საშინაო არენაზე ბოლოს 2013 წელს, "ბაიერნთან" დამარცხდა (0:3), ამის შემდეგ "ლურჯ-ბროწეულისფრებმა" შინ 19 მატჩი ჩაატარეს, საიდანაც 18 მოიგეს, 1 შეხვედრა კი ფრედ დასრულდა. გაიტანეს 62 გოლი და გაუშვეს მხოლოდ 10.
მიმდინარე სეზონში "ბარსელონამ" "კამპ ნოუზე" 3-ჯერ ითამაშა. გუნდმა "სელტიკს" ძალიან დიდი ანგარიშით, 7:0 სძლია, "სიტი" და "გლადბახი" ერთნაირი ანგარიშით, 4:0 დაამარცხა.
აღსანიშნავია, რომ მიმდინარე სეზონში "პარკ დე პრენსზე" ჩატარებული მატჩის მსგავსად, "ბარსელონამ" "ეტიჰადზეც" უღიმღამო თამაში აჩვენა, ინგლისში გუნდი 1:3 დამარცხდა. კატალონიელებმა უპირატესობა იქაც მასპინძელ გუნდს დაუთმეს, თუმცა ბარსელონაში გამართული მატჩი რადიკალურად განსხვავებული იყო.
"ბარსელონა" 2012/2013 წლების ჩემპიონთა ლიგის 1/8 ფინალში ასევე რთულ მდგომარეობაში იყო, თუმცა იქ შედარებით კარგი სიტუაცია იყო. "მილანმა" "სან სიროზე" კატალონიური კლუბი 2:0 დაამარცხა, "კამპ ნოუზე" კი თამაშის ჩაკეთვა სცადეს, თუმცა "ბლაუგრანამ" გამანადგურებელი ანგარიშით, 4:0 იმარჯვა და 1/4 ფინალში გავიდა.
რაც შეეხება "პარი სენ-ჟერმენს", ამ გუნდმა მიმდინარე სეზონში 3 გასვლით მატჩი ჩაატარა, რომლიდანაც 2 მოიგო და 1 ფრედ დასრულდა. ფრანგულმა კლუბმა "ლუდოგორეცი" სტუმრად 3:1 დაამარცხა, ბაზელს მინიმალური სხვაობით, 2:1 სძლია, ხოლო "არსენალთან" მატჩი ფრედ, 2:2 დასრულდა.
ამ სიახლეზე კომენტარები გათიშულია.
კომენტარები [ 88 ]