”რომა” მილიტოს და მასკერანოს აკვირდება

იტალიური ”რომა” კატალონიის ”ბარსელონას” ფეხბურთელებით, გაბრიელ მილიტოთი და ხავიერ მასკერანოთი ინტერესდება, იტყობინება Sport.es.

ესპანური ინტერნეტ-გამოცემის ინფორმაციით, ამერიკელი ბიზნესმენი, ტომას დი ბენედატო აპირებს, შეიძინოს იტალიური კლუბის აქციების 60%. შესაბამისად, მან უკვე დაიწყო ზრუნვა მომდევნო სეზონისთვის გუნდის შემადგენლობის გაძლიერებასთან დაკავშირებით. თავად ბიზნესმენი და მისი კუთვნილი კომპანიის, Fenway Sports Group-ის წარმომადგენლები დარწმუნებულები არიან, რომ ხავიერ მასკერანო და გაბრიელ მილიტო დიდ სარგებელს მოუტანენ იტალიის დედაქალაქის გუნდს.

ხავიერ ალეხანდრო მასკერანო კატალონიის ”ბარსელონას 2010 წელს შეუერთდა. მანამდე ის ”რივერ პლეიტის” (2003-2005), ”კორინთიასის” (2005-2006), ”ვესტჰემ იუნაიტედის” (2006-2007) და ”ლივერპულის” (2007-2010) ღირსებას იცავდა. მასკერანო 26 წლისაა და ჩამშლელი ნახევარმცველის პოზიციაზე თამაშობს.

გაბრიელ ალეხანდრო მილიტო 1980 წლის 7 სექტემბერს დაიბადა. იგი კატალონიურ გრანდში ”სარაგოსადან” გადავიდა, 2007 წელს.