პაულინიო ჩინეთში დაბრუნებაზე ფიქრობს
"ბარსელონას" ბრაზილიელი ნახევარმცველი პაულინიო, შესაძლოა, ჩინეთის ჩემპიონატში დაბრუნდეს. ამ ინფორმაციას კატალონიური Sport ავრცელებს.
წყაროს ცნობით, 29 წლის ფეხბურთელს ფინანსურად მიმზიდველი შეთავაზება აქვს, რომლის შესახებაც "ბარსელონამაც" იცის. კატალონიური კლუბი პაულინიოს აგენტთან შეხვედრას გეგმავს.
საუბარია ბრაზილიელის დაახლოებით 50 მილიონ ევროდ გაყიდვაზე. იმის გათვალისწინებით, რომ გასულ სეზონში, "ბარსამ" პაულინიოში 40 მილიონი ევრო გადაიხადა და მიმდინარე თვეში ფეხბურთელი უკვე 30 წლის ხდება, 50 მილიონი ცოტა არაა. გასათვალისწინებელია ისიც, რომ პაულინიოს ევროკავშირის მოქალაქეობა არ აქვს და მისი წასვლა კლუბს საშუალებას მისცემს იყიდოს არტური და შეინარჩუნოს იერი მინა.
პაულინიოს ტრანსფერის მინუსი მისი თამაშის სტილია, რომელიც "ბარსელონას" სჭირდება. ამ ფეხბურთელს, ნახევარდაცვაში თამაშის გარდა, სიტუაციის საჯარიმოში გამწვავებაც შეუძლია. "ბარსას" მისი შემცვლელი დასჭირდება, მაგრამ პრობლემა ისაა, რომ მსგავსი ფეხბურთელის ბაზარზე მოძებნა ადვილი არ იქნება.
ასევე ვრცელდება ცნობები, რომ პაულინიოს შეძენის სურვილს ტურინის "იუვენტუსი" და ლონდონის "ჩელსი" გამოთქვამენ.
ამ სიახლეზე კომენტარები გათიშულია.
კომენტარები [ 3 ]