რატომ დაისაჯა სერჟი რობერტო 4-ჯერ უფრო მკაცრად, ვიდრე სხვა მსგავს სიტუაციაში ისჯება?
"ბარსელონას" მარჯვენა მცველმა, სერჟი რობერტომ, ესპანეთის ფეხბურთის ფედერაციის სადისციპლინო კომიტეტისგან 4-მატჩიანი დისკვალიფიკაცია მიიღო. როგორც ირკვევა, ეს სასჯელი 4-ჯერ უფრო მკაცრია იმასთან შედარებით, რა სანქციაც სადისციპლინო კომიტეტმა 10 დღის წინ, იმავე არბიტრის მიერ ზუსტად მსგავს სიტუაციაში გაძევებულ ფეხბურთელთან მიმართებაში გამოიყენა.
პრიმერას 35-ე ტურში, "ხეტაფესა" და "ჟირონას" შორის გამართული მატჩის პირველი ტაიმის მიწურულს, ალეხანდრო ხოსე ერნანდეს ერნანდესმა მასპინძელთა მარჯვენა მცველი, დამიან სუარესი მოედნიდან გააძევა, მიზეზად კი შეხვედრის ოქმში ეს მიუთითა: "44-ე წუთზე, მოთამაშე სუარეს სუარეს დამიან ნიკოლასი მოედნიდან გავაძევე შემდეგი მიზეზით: მეტოქისათვის, თავის არეში, ხელის ჩარტყმა ძალის გადამეტებით, იმ დროს, როდესაც ბურთი სათამაშო არეალში არ იმყოფებოდა."
ამ შემთხვევიდან ზუსტად ერთი კვირის შემდეგ, იმავე მსაჯმა, ასევე მასპინძელი გუნდის მარჯვენა მცველი ასევე 44-ე წუთზე გააძევა და მიზეზად იგივე მიუთითა. "44-ე წუთზე, მოთამაშე რობერტო კარნისერ სერჟი მოედნიდან გავაძევე შემდეგი მიზეზით: მეტოქისათვის ხელის ჩარტყმა, ძალის გადამეტებით, იმ დროს, როდესაც ბურთი სათამაშო არეალში არ იმყოფებოდა." - ვკითხულობთ "ელ კლასიკოს" ოქმში.
როგორც ხედავთ, რობერტოს შემთხვევა დამიან სუარესის შემთხვევაზე მსუბუქია - სურესის შემთხვევაში საქმე ხელის თავში ჩარტყმასთან გვაქვს, რობერტოს შემთხვევაში კი დაკონკრეტება არ გვაქვს, მაგრამ ვიდეოში ჩანს, რომ რობერტო მარსელოს მხრის არეში ურტყამს და არა თავის არეში.
ამ ყველაფრის მიუხედავად, სადისციპლინო კომიტეტმა სუარესს ერთმატჩიანი დისკვალიფიკაცია მისცა, რობერტოს კი - 4-ჯერ მკაცრი სანქცია დააკისრა.
ამ სიახლეზე კომენტარები გათიშულია.
კომენტარები [ 10 ]