"ბარსელონელები" ეროვნულ გუნდებში
ახალხანს დასრულებულ სანაკრებო შეხვედრებში მონაწილეობა "ბარსელონას" არაერთმა წარმომადგენელმა მიიღო და ზოგი მათგანი თანაკლუბელსაც დაუპირისპირდა.
მარკ-ანდრე ტერ შტეგენის გერმანიამ, დიუსელდორფში, ჟერარ პიკეს, ჟორდი ალბასა და ანდრეს ინიესტას ესპანეთს უმასპინძლა. ოთხივე "ბარსელონელი" სასტარტო შემადგენლობაში იყო. ტერ შტეგენმა და ალბამ სრულად ითამაშეს, ინიესტა 46-ე წუთზე შეცვალეს, ხოლო პიკე - 51-ეზე. თამაში 1:1 დასრულდა. მე-6 წუთზე, სტუმრებმა ანგარიში ანდრეს ინიესტას საგოლე გადაცემის წყალობით გახსნეს.
პარიზში, სამუელ უმტიტის, ლუკა დინისა და უსმან დემბელეს საფრანგეთი იერი მინას კოლუმბიასთან 2:3 დამარცხდა, არადან 26-ე წუთზე 2:0 იგებდა. უმტიტი, დინი და მინა სასტარტო შემადგენლობაში იყვნენ. უმტიტიმ და მინამ სრულად ითამაშეს, დინი კი 76-ე წუთზე შეცვალეს. მან და მინამ ყვითელი ბარათები დაიმსახურეს. რაც შეეხება უსმან დემბელეს, ის მოედანზე 66-ე წუთზე გამოჩნდა, როდესაც ანგარიში 2:2 იყო. კოლუმბიამ 85-ე წუთზე გატანილი თერთმეტმეტრიანით მოიგო, რომელიც სამუელ უმტიტიზე დაფიქსირებულ წესების დარღვევას მოჰყვა. არადა, "ბარსელონას" ცენტრალურმა მცველმა აშკარად ჯერ ბურთზე ითამაშა.
ციურიხში დრამატულ ბრძოლაში ეგვიპტეს 2:1 მოუგო ანდრე გომეშის პორტუგალიამ. "ბარსელონას" ნახევარმცველი მეოდანზე 61-ე წუთზე გამოჩნდა, როდესაც მისი გუნდი ანგარიშით 0:1 აგებდა. პორტუგალიას გამარჯვება კრიშტიანუ რონალდუმ მოუტანა, რომელმაც გოლები 92-ე და 95-ე წუთებზე გაიტანა.
ამსტერდამში, საკუთარი გულშემატკივრების თვალწინ ინგლისთან 0:1 წააგო იასპერ სილესენი ჰოლანდიამ. "ბარსელონას" მე-2 მეკარე ნაკრებშიც 90 წუთი სათადარიგოთა სკამზე იჯდა.
ტრავმირებული ლეო მესის გარეშე დარჩენილმა არგენტინამ კი იტალიას სძლია.
ამ სიახლეზე კომენტარები გათიშულია.
კომენტარები [ 13 ]