"ბარსელონასა" და "რომას" კალენდარი

"ბარსელონა", ჩემპიონთა ლიგის 1/4-ფინალში "რომასთან" გასამართ მატჩებში ისედაც ფავორიტად ითვლებოდა და შიდა ასპარეზზე გუნდების მდგომარეობა კატალონიელების შანსებს კიდევ უფრო ზრდის.

"ატლეტიკოსთან" 8-ქულიანი უპირატესობა "ბარსას" აქცენტის ჩემპიონთა ლიგაზე გადატანის უფლებას აძლევს, "რომა" კი, ოთხეულში მოსახვედრად და შესაბამისად, მომდევნო სეზონშიც ჩემპიონთა ლიგაზე სათამაშოდ იბრძვის.

"ბარსელონა" "რომას", პირველ მატჩში, 4 აპრილს უმასპინძლებს. მანამდე, 31 მარტს, კატალონიელებს "სევილიასთან" რთული გასვლა აქვთ. "რომასთან" პირველი შეხვედრიდან 4 დღეში, ერნესტო ვალვერდეს გუნდი "ლეგანესს" უმასპინძლებს, განმეორებითი თამაშიდან (10 აპრილი) 5 დღეში კი - "ვალენსიას" ასევე "კამპ ნოუზე" დაუპირისპრდება.

"რომა", სერია A-ში, მე-3 ადგილზეა, მაგრამ მეოთხეზე მყოფ "ლაციოს" 3, ხოლო მეხუთზე მყოფ "ინტერს" 4 ქულით ჩამორჩება. ისიც უნდა აღინიშნოს, რომ მილანელებს ერთი თამაშით ნაკლები აქვთ ჩატარებული.

ბარსელონაში გამგზავრებამდე, 31 მარტს, რომაელები "ბოლონიას" სტუმრად დაუპირისპირდებიან. ესპანეთდან იტალიაში დაბრუნებული "ჯალოროსი", 7 აპრილს, "ფიორენტინას" უმასპინძლებს. "ბარსელონასთან" გასამართი განმეორებითი შეხვედრიდან 5 დღეში კი, დი ფრანჩესკოს გუნდს ძალიან მნიშვნელოვანი შეხვედრა ელის - "ლაციოსთან" რომაული დერბი.