მასკერანო: ცენტრალურ დაცვაში თამაში "ბარსელონაში" თავის დამკვიდრების ერთადერთი გზა იყო
"ბარსელონას" ყოფილი ფეხბურთელი, ხავიერ მასკერანო, რომელიც რამდენიმე დღის წინ ჩინურ "ჰებეიში" გადავიდა, კატალონიურ გრანდში გატარებულ პერიოდს იხსენებს და აცხადებს, რომ ცენტრალურ დაცვაში თამაში, რომელიც მისი ბუნებრივი პოზიცია არაა, გუნდში ადგილის დამკვიდრების ერთადერთი გზა იყო.
"ბარსელონაში" გატარებული წლები ჩემს კარიერაში საუკეთესო იყო, ეს გახლდათ კლუბი, რომელშიც თავს ჩამოყალიბებულ ფეხბურთელად ვგრძნობდი. ერთადერთი უარყოფითი ის იყო, რომ ჩემს პოზიციაზე, ნახევარდაცვაში თამაშს ვერ ვახერხებდი.
მცველობა ძალიან რთული საქმეა, განსაკუთრებით მაშინ, როცა გამოცდილება არ გაქვს. ერთ შეცდომასაც თუ დაუშვებ, პასუხი უნდა აგო. თუმცა, დროთა განმავლობაში ამას შევეჩვიე.
მახსოვს, ჩემპიონთა ლიგაზე, "შახტარის" წინააღმდეგ თამაშისთვის ვემზადებოდით. დიდი იმედი არ მქონდა იმის, რომ სასტარტო თერთმეტეულში მოვხვდებოდი, თუმცა, ცოტა ხნის შემდეგ, გვარდიოლამ შემადგენლობა დაასახელა და აღმოვაჩინე, რომ ჩემს ცენტრალურ მცველად დაყენება ჰქონდა განზრახული. ამაზე მწვრთნელს ჩემთან არასდროს უსაუბრია, მაგრამ იმ დღეს მან ასეთი გადაწყვეტილება მიიღო.
ჩავთვალე, რომ ეს ჩემი ერთადერთი შანსი იყო. ერთადერთი გზა, რომლის საშუალებითაც გუნდში თავს დავიმკვიდრებდი. გავაანალიზე, რომ ნახევარმცველის რანგში მყოფს "ბარსელონას" ძირითად შემადგენლობაში თამაშის იმედი თითქმის არ უნდა მქონოდა, დაცვაში კი მეტი სათამაშო დრო მომეცემოდა. ამ შესაძლებლობას მოვეჭიდე და ვცადე, ჩემი მაქსიმუმი გამეკეთებინა.
არასდროს მიხაროდა ის, რომ მოედნის იმ ნაწილში ვთამაშობდი, სადაც, ჩემი აზრით, ჩემი ადგილი არ იყო, მაგრამ, საბოლოო ჯამში, ამ გზით "ბარსელონაში" ჩემი ადგილი დავიმკვიდრე და ამით ძალიან კმაყოფილი ვარ".
ამ სიახლეზე კომენტარები გათიშულია.
კომენტარები [ 14 ]