ოფიციალურად: არდა თურანი "ბაშაქშეჰირში" ითამაშებს
რამდენიმე წუთის წინ, სტამბოლის "ბაშაქშეჰირმა" და "ბარსელონამ" თურქი შემტევი ნახევარმცველის, არდა თურანის ტრანსფერი ოფიციალურად დაადასტურეს.
"არდა თურანი სამშობლოში ბრუნდება და დღეიდან ის ფორთოხლისფერი იქნება. ეს ტრანსფერი არა მხოლოდ "ბაშაქშეჰირისთვის", არამედ მთელი თურქეთისთვის, ყველა ჩვენგანისთვისაა." - ვკითხულობთ "ბაშაქშეჰირის" ოფიციალურ განცხადებაში.
"ბარსელონას" ოფიციალური ვებგვერდის ცნობით, თურანი "ბაშაქშეჰირში" 2.5 წლის განმავლობაში, იჯარით ითამაშებს. ამ დროის განმავლობაში, "ბარსელონა", თურანის თამაშიდან გამომდინარე, ბონუსებს მიიღებს. სატრანსფერო ფანჯრის პერიოდებში, "ბარსელონას" ფეხბურთელის სხვა კლუბისთვის მიყიდვის უფლება ექნება, "ბაშაქშეჰირი" კი, თავის მხრივ, თურანის გამოსყიდვის უფლებას ფლობს.
არდა თურანი "ბარსელონაში" 2015 წელს, მადრიდის "ატლეტიკოდან" 34 მილიონი ევროს სანაცვლოდ გადავიდა. კატალონიური კლუბის მაისურით მან 55 შეხვედრა ჩაატარა, 15 გოლი გაიტანა და 6 ტიტული მოიგო.
ამ სიახლეზე კომენტარები გათიშულია.
კომენტარები [ 18 ]