სერხიო რამოსი პიკეს მხარს უჭერს
მადრიდის "რეალისა" და ესპანეთის ეროვნული ნაკრების ცენტრალური მცველი სერხიო რამოსი გულშემატკივრებს მოუწოდებს, "სანტიაგო ბერნაბეუზე" 2 სექტემბერს გასამართი დაპირისპირების დროს, ჟერარ პიკეს მხარი ისევე დაუჭირონ, როგორც ნაკრების სხვა ფეხბურთელებს.
2 სექტემბერს, მსოფლიო ჩემპიონატის შესარჩევი ეტაპის მატჩში, ესპანეთი იტალიას უმასპინძლებს. თამაში "სანტიაგო ბერნაბეუზე" გაიმართება და მოსალოდნელია, რომ მადრიდელი გულშემატკივრები ნაკრების ერთ-ერთ ლიდერს, ჟერარ პიკეს კვლავ სტვენით შეხვდებიან. ამის მიზეზი ისაა, რომ ჟერარ პიკე კატალონიის დამოუკიდებლობის მომხრეა და გარდა ამისა, ის "რეალის" კრიტიკას არ ერიდება.
"არ აქვს მნიშვნელობა, საქმე პიკეს ეხება, თუ სხვა ვინმეს. პატივი უნდა ვცეთ იმ ფეხბურთელებს, რომლებიც ჩვენი ქვეყნის დროშას იცავენ და პიკე ერთ-ერთი მათგანია.
გულშემატკივრებს ვთხოვ, მხარი დაგვიჭირონ, რადგან წინ ძალიან დაძაბული დაპირისპირება გველის. კარგი ფეხბურთის ჩვენება და წარმატებული მატჩის ჩატარება გვსურს." - ციტირებს რამოსის სიტყვებს AS.
ამ სიახლეზე კომენტარები გათიშულია.
კომენტარები [ 5 ]